سەرەتا / دیتن و دیمانە / شاجوانی كوردستان: گۆرانییەكم بە زمانی ئینگلیزی هەیە

شاجوانی كوردستان: گۆرانییەكم بە زمانی ئینگلیزی هەیە

زانا دڵشاد دزەیی :

هەمیشە سوپاسی خوا و دایكم دەكەم

زۆربەی رۆژووەكانم گرتووە و نوێژیش دەكەم

پێم باشترە خەڵكی وڵاتی خۆم جنێوم پێ بدا نەك دەستخۆشی لە وڵاتێكی دیكە وەرگرم

زوو زوو بیرم دەچێتەوە من شاجوانی كوردستانم

بەنیازم لەمەودوا هەر جلی كوردی لەبەربكەم

لەچەند كەناڵێك داوام لێكراوە بۆ پێشكەشكاری

شێنێ عەزیز ئاكۆ، تەمەن 19 ساڵ، كە لەفیستیڤاڵی “هەلا ئەربیل” لەشەوی 28/6/2012 لەهوتێل “رۆتانا”ی شاری هەولێر لەنێو 12 كچدا وەكو شاجوانی كوردستان بۆ ساڵی 2012 هەڵبژێردرا، ئێستا بەیەكجاری لەگەڵ دایكی گەڕاوەتەوە كوردستان و لەهەولێر نیشتەجێیە، ئەم چاوپێكەوتنە رۆژنامەوانییەی لەگەڵ (سڤیل) دەبێتە یەكەم چاوپێكەوتنی ئەو كە تێیدا زۆر شتی لەبارەی ژیانی تایبەتی خۆی باس دەكات، كە تائێستا باسی نەكردووە.

یەكەم شت دەمەوێ پرسیاری ئەوەت لێ بكەم بۆچی تاجی شاجوانیت لەسەر نییە؟
شاجوانی كوردستان: لەبەرئەوەی چوومەوە بۆ نەرویج، لەوێشەوە سەفەری لوبنانم كرد، لەلوبنانەوە هاتمەوە كوردستان، تاجەكەم لەوێ لەبیرچوو، پێیان گوتم بێخەمبە بۆت دەگەڕێنینەوە.
 دەتەوێ لەساڵی شاجوانیت چ پڕۆژەیەك لەكوردستان جێبەجێ بكەی و یەكەم پڕۆژەت چییە؟
شاجوانی كوردستان: زەحمەتە بڵێم یەكەم پڕۆژەم چییە، لەبەرئەوەی چەند پرۆژەیەكمان داناوە، هەتا ئێستا نازانم لەكوێوە دەست پێدەكەین، من وەكو شاجوان هیچ جیاوازییەكم نییە لەگەڵ شاجوانەكانی دیكە، دەمەوێ ئەو ئیشانەی كە شاجوان دەیكات منیش بیكەم، سەردانی چەند قوتابخانەیەك و زیندانی ژنان و رێكخراوەكانی تایبەت بەئافرەتان لەكوردستان بكەم، هەروەها سەردانی چەند وڵاتێك بكەم وەكو لەكۆنگرەكە گوتم بۆئەوەی كوردستانیان زیاتر پێ بناسێنم، حەزدەكەم لەوەش زیاتر بكەم.
یەكەم سەردانت وەكو شاجوانی كوردستان بۆ كام وڵات دەبێ؟
شاجوانی كوردستان: حەزدەكەم لەشارەكانی كوردستانەوە دەست پێ بكەم، چەند وڵاتێكمان داناوە، بۆ نموونە ئوردن، یەمەن، توركیا، بەڵام تائێستا نازانم كام وڵات دەبێتە یەكەم وڵات، خۆم چووم بۆ لوبنان، بەس ئەوە تەنیا وەكو شاجوانی كوردستان نەبوو، بەڵام بەنیازین وەكو شاجوانی كوردستان بە بەرنامەوە بڕۆینەوە بۆ لوبنان.
بەشداری لەفیستیڤاڵەكان دەكەی بۆ ئەم وڵاتانەی باستكرد یاخود هەروەكو سەردان دەبێت؟
شاجوانی كوردستان: من ناچم خۆم نمایش بكەم، تەنیا بۆ گەڕان و سوڕانی خۆم ناچم، دەمەوێ كوردستانیان پێ بناسێنم، پێیان رادەگەیەنم كە وڵاتێكی زۆر جوانمان هەیە، دەمانەوێ هەولێر ببێتە پایتەختی گەشتوگوزاری وڵاتانی عەرەبی، بێن سەردانی كوردستان بكەن.
كاتێك بەشداری لەفیستیڤاڵی وڵاتان دەكەی، بەچ جلوبەرگێك بەشداری دەكەی؟
شاجوانی كوردستان: ئەگەر بەدڵی من بوایە بۆ ماڵەوەش جلی كوردیم لەبەر دەكرد، هەروەها پێم خۆشە بۆ هەموو فیستیڤاڵێك و چاوپێكەوتنێكم هەر بەجلی كوردی بم، كردوومە و دەشیكەم، بەنیازیشم تەنیا جلی كوردی لەبەر بكەم، لەبەرئەوەی هیوایەتم جلی كوردیە، وەكو شاجوانێك پێویستە كەلتووری خۆمان بەخەڵكی دیكە نیشان بدەم.
خەڵكانێك لەفەیسبووك رەخنەیان لەلیژنەكە گرت و دەیانگوت شێنێ شایانی ئەوە نەبوو ببێتە شاجوان، تۆ چ قسەیەكت بۆ رەخنەكان هەیە كە دەڵێن شاجوانی كوردستان جوان نییە؟
شاجوانی كوردستان: دائیمەن سوپاسی ئەو خەڵكانەم كردووە، كە خۆیان بەمنەوە ماندوو دەكەن، ئەوە رای خۆیانە، من حەزدەكەم خەڵكی وڵاتی خۆم جنێوم پێ بدا نەك دەستخۆشی لەوڵاتێكی دیكە وەرگرم، ئەگەر رەخنەی ئەوان ئەوە بێت، كە من جوان نیم، زۆر بەلامەوە ئاساییە، لەبەرئەوەی جوانی لەناخەوەیە، ئەگەر من شایانی ئەوە نەبوومایە بەدڵنیاییەوە هەڵنەدەبژێردرام، سوپاسی ئەو كەسانە دەكەم، وەڵامی رەخنەكانی خەڵكیان داوەتەوەو شتی جوانیان لەسەر من نوسیوە.
ئێستا پەیوەندیت لەگەڵ كچە بەشداربووەكانی دیكە چۆنە؟
شاجوانی كوردستان: پەیوەندیمان زۆر خۆشە، كەی كاتمان هەبێ یەكتر دەبینین، چونكە هەموومان لەهەولێر ناژین، من بۆ یەكجاری گەڕاوەمەتەوە بۆ هەولێر، تائێستا نەچوومەتەوە شارەكەی خۆم رانیە، بەنیازم لەم هەفتەیە بچمە رانیە.
هیچ قسەیەكت بۆ كچانی كورد هەیە؟
شاجوانی كوردستان: وەكو كچێكی كورد باوەڕم بەخۆم هەیە، ئێمە كچی زۆر جوان و زیرەكمان تێدا هەیە، هیوادارم ئەو كچانەی كە باوەڕیان بەخۆیان هەیە بۆ ساڵێكی دیكە بەشداری ئەم پڕۆگرامە بكەن، هەر خەونێكیان هەبێ هیوادارم بتوانن بیهێنە دی، چۆن من وەكو كچێكی كورد باوەڕم بەخۆم هەیە، بەڵام بەداخەوە زیاتر كەلتوورەكەیە لەزۆر شت رێگەیان لێدەگرێ.
كاتێك پێتدەڵێن شاجوان هەست بەچی دەكەی؟
شاجوانی كوردستان: من زوو زوو بیرم دەچێتەوە شاجوانی كوردستانم، لەبەرئەوەی ئەوەندە سەرقاڵم بەپرۆژەكانم، لەئێستاوە خۆم ئامادەكردووە بۆ چەند پڕۆژەیەك، كە یەكێك بانگم دەكات بە شاجوانی كوردستان ئاوڕم نەداوەتەوە، چونكە بیرم چۆتەوە من شاجوانم، زۆر خەڵك لەوانەیە واهەست بكات تەنیا بۆ نمایشكردن بەوڵاتاندا بسوڕێم، زۆر خەڵك دەڵێن بۆ گەڕان و سوڕان و پارە و دەوڵەمەندی بوویە شاجوانی كوردستان، وانییە، من خەونێكم هاتۆتەدی كە بوومەتە شاجوانی كوردستان، بەڵام خەونێكی گەورەتر هاتۆتەدی من گەڕاومەتەوە بۆ وڵاتەكەی خۆم كە بتوانم خزمەتیان بكەم، ئەوە هەستێكی خۆشم دەداتێ، ئەگەر شاجوانی كوردستان نەبوومایە ئەو رێگەیەم بۆ نەدەكرایەوە خزمەتی كوردستان بكەم.
 لەناو خێزانەكەتدا كامیان بەیەكجاری لەگەڵت هاتۆتەوە كوردستان؟
شاجوانی كوردستان: دایكم لەگەڵم هاتۆتەوە بەیەكجاری، بەڵام برایەكەم جارێ لەقوتابخانەیە، چەند مانگێكی دیكە تەواو دەبێ، “بەپێكەنینەوە” بەڵام وردە وردە هەموویان دێنمەوە كوردستان.
چ قسەیەك هەیە كە لەلایەن خەڵكەوە بەتۆ گوتراوە دڵی خۆش كردووی، قسەكە راستەوخۆ پێتگوترابێ یاخود ناڕاستەوخۆ؟
شاجوانی كوردستان: قسەیەك رۆژانە دەیبیستم و رووبەڕووش پێم دەگوترێ تۆ شێنی عەزیزی؟ بەراست تۆ شاجوانی؟ لەبەرئەوەی نامناسنەوە، دەڵێن بەڕاست تۆ لەنزیكەوە زۆر جوانتری، زۆر خەڵك راستەوخۆ پێی گوتم شێنێ تۆ ئێستا زۆر جوانتری لەو شەوەی كە تۆ هەڵبژێردرای.
فیلمەكانت بە چ زمانێكن و باسی چی دەكەن؟
شاجوانی كوردستان: كورتە فیلمی یەكەمم پاكستانی- هیندی بوو، سێ بەشە، من لەبەشی دووەم بەشداریم كرد، زۆر خەڵك وادەزانن لەسەر مافیایەو لەگەڵ مافیا فیلمم كردووە، راستییەكەی فیلمەكەم باسی كوڕێكی هەژار دەكات كە خەون بە تەیارە و بەكچی جوان دەبینێ، قەت بە خەونەكانی خۆی ناگات.
فیلمی دووەم نەرویجییە، 18ی ئەم مانگە لەفیستیڤاڵی نەرویج پیشان دەدرێت، باسی ئەوە دەكات، هاوڕێ هەمیشە راستگۆ نییە، خۆشەویسترین هاوڕێی خۆت دەتوانێ خیانەتت لێ بكات. هەروەها فیلمی سێیەمم كورتە فیلمێكی كوردییە بەناوی “وا لەخوشكەكەم مەكەن” كە هەفتەیەك پێش ئێستا لەفیستیڤاڵی لاوان لەهەولێر نیشاندرا.
ئەگەر ئێستا دەرهێنەرێك داوات لێ بكات بۆ بەشداریكرن لەفیلم و یاخود دراما ئامادەی بەشداری بكەی؟
شاجوانی كوردستان: دەكەوێتە سەر سیناریۆیەكە، لەبەرئەوەی بۆمن گرنگ نییە لەفیلمێك دەربكەوم و بناسرێم، گرنگ شتێكی باش بێت.
لەرووی كۆمەڵایەتییەوە كەسێكی چۆنی؟
شاجوانی كوردستان: ئێستا قسەیەكت بۆ دەكەم تێبگە من چۆنم، دائیمەن دایكم پێمدەڵێ یەك تۆز لەماڵەوە دانیشە و تێكەڵاوی ئەوەندە خەڵك مەكەو ئەوەندەش چەنەبازی مەكە، هەتا بڵێی كەسێكی كراوەم، وابزانم هەندێكات ئەوەش خراپە، كراوەو دڵپاك و دڵسافم.
شووكردن لەبەرنامەتدایە؟
شاجوانی كوردستان: تائێستا لەبەرنامەمدا نییە، كەی خوا هێنای بەخێر بێت.
دەبێ ئەو پیاوە چ سیفاتێكی هەبێ؟
شاجوانی كوردستان: لەئاستی خۆم بێت، ناخی جوان بێت، چونكە یەكێك ناخی جوان بێت ئۆتۆماتیكی روخساری جوان دەبێ، من باوەڕم بەقسمەت و نسیب هەیە، كەركووكی و هەولێری یاخود سلێمانی یان رانیەیی بێت ئەوە قسمەت و نسیب.
حەزت لەدەنگی چ گۆرانیبێژێكە؟
شاجوانی كوردستان: ئیسماعیل سابوری و عەدنان كەریم و بەهجەت یەحیا. زۆر حەزم لەدەنگی ئەم سێ هونەرمەندەیە، هەروەها عەزیز وەیسی، لەئافرەتەكان زۆر حەزم لە دەنگی هانییە، دەمێكە گوێی لێ دەگرم، بەتایبەت گۆرانییەكی هەیە بەناوی شەپۆل، هەروەها شەهێن تاڵەبانی.
فەیسبووكت هەیە؟
شاجوانی كوردستان: نەخێر نیمە، فەیسبووك بەناوی من هەیە، بەڵام ئەوە شێنێ عەزیز نییە، بەڵام بەنیازم پەیجێك بۆ خۆم لە فەیسبووك دابنێم.
وەكو خۆتت گوتت تۆ كەسێكی زۆر كۆمەڵایەتی، چۆنە تائێستا فەیسبووكت نییە؟
شاجوانی كوردستان: نامەوێ بە ئینتەرنێت ئاگام لەپەیوەندییە كۆمەڵاتییەكان بێت، من زیاتر حەزدەكەم دوو كەس پێكەوە دانیشین قسە بكەین.
لەگەڵ مانگی رەمەزان چۆن بووی؟
شاجوانی كوردستان: باش بووم، زۆربەی رۆژەكانم گرتووەو نوێژیش دەكەم، ئەوە بزانن رەمەزان لەكوردستان زۆر خۆشەو زۆر ئاسانتریشە، لەوڵاتەكانی دیكە زۆر زەحمەتە، لەبەرئەوەی خەڵكەكانی دەوروبەرت هەموویان دەخۆن، ئەگەر بەرۆژووش نەبی وابزانم جەژنەكەش زۆر ناخۆش دەبێ.
بورجت چییە، باوەڕت پێی هەیە؟
شاجوانی كوردستان: بورجەكەم سەتڵە، دەیخوێنمەوە، بەڵام هەندێكی وایەو هەندێكی وانییە، نوسینەكە بەتەنیا بۆ تۆ نییە، بۆ هەموو ئەو كەسانەیە كە لەم بورجە دان، باوەڕت پێی هەبێ شتەكە دەبێ و باوەڕت پێی نەبێ شتەكە نابێ.
ئەگەر كەناڵێك بۆ پێشكەشكاری داوات لێ بكات دەیكەی؟
شاجوانی كوردستان: جارێ نازانم، لەچەند كەناڵێك داوام لێكراوە بۆ پێشكەشكاری، بەڵام جارێ وەڵامم نەداوەتەوە.
دەنگت خۆشە؟
شاجوانی كوردستان: نامەوێ وەكو گۆرانیبێژێك گۆرانی بڵێم، بەڵام دوو ساڵ پێش ئێستا لەوڵاتی نەرویج گۆرانیم گوتووە، بەڵام بەئینگلیزی گۆرانییەكم هەیە.
كەسێكی تایبەت هەیە سوپاسی بكەی؟
شاجوانی كوردستان: هەمیشە سوپاسی خوا و دایكم دەكەم. (298) جار بینراوە

2 لێدوانەکان

  1. walla dada gyan har to mabwi gorani blei, qur basar hunari kurdi…

  2. zor slaw la hunarmandi gaura himn

Leave a Reply

Your email address will not be published.بۆشای دیاری کراوە بە *

*

دەتوانی ئەو تاگ و خەسڵەتانە HTML بەکاربێنیت: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

بڕۆ بۆ سەرەوە